تي برّة قيِّد

اخي المواطن، سامحني ناخذ من وقتك دريّج من زمان.
مانعرفش كان في بالك و الا لا، اما باش تنجم تصوت نهار 23 اكتوبر و نخرجو من هالحالة الحرفة، لازمك تمشي تقيد روحك و كان تعمل مزيّة تهز معاك الشايب و العزوزة.
نعرف انو في هالسخانة هاذي ما عندك وين يدور الريح لذا هاو باش نعطيك 10 اسباب باش تمشي و انشالله نقنعك
1. المصاروة و المغاربة صوتو للدستور الجديد متاعهم و ماشالله الكلهم مشاو. باللاهي تعمل مزية ماتخليهمش شايخين علينا و عاملينا تكركيرة في هالشهيلي
2. لا فما كورة و مركاتو لا مسلسلات و لا باب الحارة 12 رمضان السنا، الجرايد، التلافز و حتا فورومات الكورة باش تحكي على الانتخابات و انت باش تولي اقوى في فهمك للسياسة من تحاليل خالد حسني في الكورة. كي انت باش تصرف تصرف، اقرا حسابك و قيد امالا. و اعمل مزية و تنڨيزة على البلدية قبل ما يبدى سيدي رمضان خاطر اخر اجل
2 اوت
3. الهيئة متاع الانتخابات ممكن تهبط كلاسمون لكل جمعية قداه عندها من واحد مقيد. والله اعلم.
4. باش تڢيس على فايسبوك بالبادج متاع « أنا قيّدت «
5. باش بن علي مايتشمتش فينا. ديجا تلقاه توة شايخ على الحالة متاعنا، ما نزيدوش نشمتوه فينا.
6. خاطرك فدّيت من « اسف، لم تنجح » فيالكاپاس و تحب كل واحد و ذراعو و لا رشوة لا والو
7. خاطر روحك طلعت مالاعتصامات و المظاهرات و المسيرات السملية و العنيفة و اللي تضيع في الجرة
8. خاطرك تموت على الشيوعية/العلمانية/الليبيرالية/القومية/التيارات الاسلامية و ماذابيك الشيوعية/العلمانية/الليبيرالية/القومية/التيارات الاسلامية تاكل كبوط في الانتخابات
9. خاطر الهيئة اللي قاعدة تريڨل في الانتخابات تعمل في خدمة مزيانة و السپوت متاعهم في التڢزة هايل
 10. خاطر فما شكون كلا الكرطوش باش احنا نصوتو، مافيها باس كان قصينا ربيع ساعة على التبحيرة و مشينا قيدن

– Par Alaa –

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.